ബാബു പറശ്ശേരി ജില്ലാ പഞ്ചായത്ത് പ്രസിഡന്റ്

കോഴിക്കോട് ജില്ലാ പഞ്ചായത്ത് പ്രസിഡന്റായി സി.പി.എമ്മിലെ ബാബു പറശ്ശേരിയും വൈസ് പ്രസിഡന്റായി സി.പി.ഐ.യിലെ റീന മുണ്ടേങ്ങാടും ചുമതലയേറ്റു. ജില്ലാ പഞ്ചായത്ത് ഹാളില്‍ നടന്ന ചടങ്ങില്‍ കളക്ടര്‍ എന്‍.പ്രശാന്ത് ബാബു പറശ്ശേരിക്ക് സത്യവാചകം ചൊല്ലിക്കൊടുത്തു. വൈസ് പ്രസിഡന്റ് റീന മുണ്ടേങ്ങാടിന് പ്രസിഡന്റ് ബാബു പറശ്ശേരി സത്യവാചകം ചൊല്ലിക്കൊടുത്തു. ഇരുവരും ദൃഢപ്രതിജ്ഞയെടുത്തു.
27അംഗ ജില്ലാ പഞ്ചായത്തില്‍ 16 വോട്ടുകള്‍ നേടിയാണ് പ്രസിഡന്റും വൈസ് പ്രസിഡന്റും തിരഞ്ഞെടുക്കപ്പെട്ടത്. പ്രസിഡന്റ് സ്ഥാനത്തേക്ക് ബാബു പറശ്ശേരിയെ മുക്കം മുഹമ്മദ് നിര്‍ദേശിച്ചു. ടി.കെ.രാജന്‍ പിന്താങ്ങി. യു.ഡി.എഫ്. സ്ഥാനാര്‍ഥിയായി അഹമ്മദ് പുന്നക്കലിനെ വി.ഡി.ജോസഫ് നിര്‍ദേശിച്ചു. എ.ടി.ശ്രീധരന്‍ പിന്താങ്ങി. വൈസ് പ്രസിഡന്റ് സ്ഥാനത്തേക്ക് റീന മുണ്ടേങ്ങാടിനെ പി.ജി.ജോര്‍ജ് നിര്‍ദേശിച്ചു. പി.കെ.സജിത പിന്താങ്ങി. യു.ഡി.എഫ്. സ്ഥാനാര്‍ഥിയായി അന്നമ്മ മാത്യുവിനെ സി.കെ.കാസിം നിര്‍ദേശിച്ചു. എം.പി.അജി പിന്താങ്ങി.