ഡിജിറ്റൽ ലോക്കർ..നമ്മുടെ സർട്ടിഫിക്കറ്റുകൾ ഇനി ഗവണ്മെന്റ് സൂക്ഷിക്കട്ടെ..
ഇ-ഡിസ്ട്രിക്ട് പദ്ധതിവഴി ഓണ്‍ലൈനായി കിട്ടുന്ന സര്‍ട്ടിഫിക്കറ്റുകള്‍ ഇനി ഡിജിറ്റല്‍ ലോക്കറിലേക്കും. അപേക്ഷാ സമയത്തുതന്നെ ആധാര്‍ നമ്പര്‍കൂടി നല്‍കിയാല്‍ പേപ്പര്‍ സര്‍ട്ടിഫിക്കറ്റുകള്‍ നല്‍കുന്നതിനൊപ്പം അവയുടെ ഡിജിറ്റല്‍ പതിപ്പ് ഡിജിറ്റല്‍ ലോക്കറിലേക്കും പോകും. ഉടമയ്ക്ക് ഏതുസമയത്തും ലോക്കറില്‍നിന്ന് അത് ഡൗണ്‍ലോഡ്‌ചെയ്ത് ഉപയോഗിക്കാനുമാകും. ഭാവിയില്‍ ജോലിക്കും മറ്റും അപേക്ഷിക്കുമ്പോള്‍ സര്‍ട്ടിഫിക്കറ്റുകളുടെ പകര്‍പ്പുകൂടി വെക്കുന്നതിന് പകരം ആധാര്‍ നമ്പര്‍ മാത്രം നല്‍കിയാല്‍ സ്ഥാപനങ്ങള്‍ക്ക് ഡിജിറ്റല്‍ രൂപത്തില്‍തന്നെ അവ പരിശോധിക്കാനാകുന്ന സംവിധാനത്തിലേക്കുള്ള കാല്‍വെപ്പാണിത്.രാജ്യത്തെ പൗരന്‍മാരുടെ ആധാര്‍ നമ്പറുമായി ബന്ധിപ്പിച്ചിരിക്കുന്ന ഒണ്‍ലൈന്‍ പ്രമാണസംഭരണ സംവിധാനമാണ് ഡിജിറ്റല്‍ ലോക്കര്‍. ആധാര്‍ നമ്പറുള്ള ആര്‍ക്കും അവരുടെ വോട്ടര്‍ ഐ.ഡി., പാന്‍കാര്‍ഡ്, ഡ്രൈവിങ് ലൈസന്‍സ് തുടങ്ങിയവ ഡിജിറ്റലായിതന്നെ ഇതില്‍ സൂക്ഷിക്കാം. ഒറ്റത്തവണ പാസ്സ്വേഡ് പോലുള്ള തികച്ചും സുരക്ഷിതമായ സംവിധാനത്തിലൂടെ നാം നല്‍കുന്ന ലിങ്കും അനുമതിയും ഉപയോഗിച്ച് അവ എവിടെനിന്നും ആര്‍ക്കും പരിശോധിക്കാനുമാകും. അതുകൊണ്ടുതന്നെ സര്‍ട്ടിഫിക്കറ്റുകളും മറ്റും പരിശോധിക്കുന്നതിന് അവ നേരിട്ട് ഹാജരാക്കേണ്ടിവരില്ല. | |
| Posted by : admin, 2015 Jun 08 09:06:40 pm |
